احباط - احباط - احباط

في الفترة الاخيرة ابتديت افهم ان انا عندي مشاعر كتيرة باحس بيها و من المشاعر الجديدة عليا احساس الاحباط

ابتديت احس بالاحباط من حوالي اسبوعين كدة و من ساعتها و هو لازق و مش عايز يسيبني و كل ما اظبط روحي و اتغلب على احساس الاحباط الاقي حاجات تاني تحصل تحسسني باحباط اكتر و اكتر

النهاردة كان في في حاجتين كنت عايز اعملهم و للاسف الاتنين فشلت في تنفيذهم – بس نتيجة ظروف تعتبر خارجة عن ارادتي

1. المعالج من فترة طويلة كان قالي على ابونا في الكنيسة و اقترح عليا اني اتكلم معاه و اداني رقمه بس للاسف تليفونه كان علطول مقفول – امبارح قررت اروح الكنيسة و احاول اعرف مواعيده علشان اقابله و الموضوع كان صعب قوي و اخدت وقت كتير قوي علشان اعرف اوصل للمعلومة غالبا بسبب كسوفي و اني مش باعرف اتعامل قوي مع الناس و ده في حد ذاته سببلي احباط – النهاردة قولت اروح احضر قداس في الكنيسة و بعد كدة احاول اشوف ابونا و اتكلم معاه – المشكلة اني عمري ما شوفته قبل كدة و كنت محرج قوي اسأل حد هو مين في الاباء الموجودين – قولت هاروح عند مكتبه و استناه – بس علشان الاحباط يكمل بقى ابونا ما راحش مكتبه !!

2. من فترة طويلة قوي و انا عايز اقول لواحد من اصحابي الغيرين عن ميولي المثلية و عايز بس مجرد اني ابدأ معاه بكلام عن طفولتي و المشاكل المختلفة اللي بامر بيها – احاول يعني اكسر مظهر القوة المزيف اللي دايما باظهر بيه – المشكلة كل ما اخد قرار اني افتح كلام معاه تحصل حاجة و الفرصة ما تبقاش مناسبة – النهاردة قولت لروحي خلاص انا مش هافضل استنى الظروف و ادور هافتح الموضوع ازاي – انا زي ما بيقولوا كدة هاقطع عرق و اسيح دم - يعني ببساطة هاتصل بيه و اقوله انا محتاج اتكلم معاك – المفروض ان اصحابنا كلهم هايخرجوا النهاردة فكنت هاكلمه اقوله انا محتاج اقابلك قبل ما نخرج علشان عايز اتكلم معاك – يدوب لسة باشجع نفسي علشان اعمل الخطوة دي – لقيت تليفون البيت بيرن – طلع واحد تاني من اصحابنا و قالي ان صاحبي اللي انا عايزه ده دلوقتي خارج مع اخوه و بيرتب معايا نقابلهم امتى
طبعا كدة خلاص باظت مش هاينفع اتكلم معاه النهاردة
بعد الموقف ده حسيت باحباط رهيب و كنت خلاص بقى عايز اولع في روحي

طبعا انا اتكلمت بس عن الاحباطات بتاعة النهاردة ما اتكلمتش عن الاحباطات المختلفة اللي بامر بيها ما بين احساسي اني مش عارف اغير شخصيتي و اتعامل مع الناس اكتر – ما بين كلام باسمعه من اصحابي من غير قصد بيوصلي نفس المعنى – ما بين احساسي اني مش لاقي حب و اهتمام من حد "مش هانكر طبعا اني لقيت قبول من ناس كتير – بس مش حاسس بالحب او الاهتمام"

انا حاسس اني تعبت من كتر الاحباط ده
حاسس ان المشوار صعب قوي

يا رب اسندني و ساعدني اكمل و اتغلب على الاحباط ده