قصتي مع المثلية - قرار التغيير - بداية مشوار التعافي

النهاردة عايز اتكلم عن رحلتي الطويلة مع المثلية و عن قرار التتغيير

بداية الموضوع كممارسات كان من حوالي 12 سنة - يااااااااااااه ما كنتش متخيل انه رقم كبير كدة
كانت كلها مع واحد صاحبي و ما كنتش قادر امسك ان في حاجة غلط و لا متخيل اني عندي مشكلة
بعد حوالي 3 سنين قولت اكيد اللي بيحصل ده غلط و اخدت اول قرار للتوقف في حياتي
التوقف ده استمر تقريبا 4 سنين - في ال 4 سنين دول كانت بتجيلي افكار - ممكن احس اني منجذب لناس معينة
مكنتش باركز قوي و سيبت نفسي على اني عادي و مفيش مشكلة
رجعت بعد الفترة دي افكر و بدات اتعرف تاني و بدات اقع كتير قوي
فضلت عايش بين اني اقع و اقوم و اقول هابطل - و ما اكملش و اقع تاني
كنت بادور على حاجة غامضة ما كنتش عارف ايه هي - بس بعد فترة فهمت اني مش عايز جنس
انا عايز حب - احساس ممكن اكون مفتقده من زمان
دخلت في علاقات فاشلة كتير - اطول علاقة كانت 3 شهور

اكتر حاجة كانت بتخليني اقول اني عايز اتغير هو الدافع الديني و الخوف من المجتمع
مع الوقت و كتر الناس اللي اتعرفت عليهم بدأت الدوافع تقل قوي و بدأت احس ان مفيش فايدة ...

من حوالي سنتين قررت اجرب الطب النفسي - و في حد مثلي قالي على دكتور و روحتله
بس للاسف ما كانش بيعالج حاجة عندي - كان مركز على ادوية تخليني اكون هادي جنسيا
ما انكرش انه فرق معايا فترة - بس في الاخر لقتني زي ما انا - مفيش حاجة اتغيرت
استمريت معاه 9 شهور تقريبا - و بعد كدة بطلت اروحله و وقفت الادوية

ناس كتير كانت بتقولي انت مولود كدة و مش ممكن تتغير - و انا بدأت اقتنع بده
كانت اكبر مشكلة اني حتى لو اقتنعت بده - فانا بادور على علاقة حب "علاقة انسانية اكتر منها جنسية" و ده مش موجود
و لو اتوجد هايستمر فترة و يقف
و فعلا كنت باتعرف كتير و اخد على دماغي كتير
لغاية ما فهمت اني باجري ورا سراب

مجرد وهم باحاول اوصله و هو مش موجود - لقيت نفسي تايه - ما بقتش عارف انا مين
انا عايز ايه في حياتي ابتديت احط الاختيارات قدامي

1- اقبل بالوضع كما هو عليه و اكمل حياتي كمثلي
2- اتغير و اعيش حياة طبيعية

بالنسبة لاول اختيار - شكله سهل و مش محتاج مجهود - بس لما فكرت فيه كويس لقيته هايخليني اعيش في عذاب و اوهام طول عمري
و افضل طول حياتي ادور على وهم و سراب مش موجود - بالتالي صعب اني اقبل بالاختيار ده

تاني اختيار - التغيير - لقتني باقول لنفسي
انت فاكر انك ممكن تتغير
انت جربت كتير و كل مرة بترجع تاني
و كل ما بترجع بتكون اسوأ من الاول
وفي ناس كتير "منهم الطب النفسي في الغرب" بيقولوا ان دي حاجة طبيعية و التغيير مش ممكن

لقيت نفسي تايه قوي مفيش اختيار من دول نافع - طب اعمل ايه - اولع في روحي و اخلص ؟؟!!

في الفترة دي بدأ اسم دكتور اوسم يجي قدامي كتير - بدات اسمع عنه
بدات اقرا ان التغيير ممكن

قولت لنفسي طب ما اجرب تاني - هاخسر ايه - اهي محاولة و يمكن تجيب نتيجة

فعلا بدات من حوالي 4 شهور اروح لدكتور اوسم

و بدات فعلا احس بفرق في حياتي و بقى عندي امل كبير قوي اني اتغير
و حسيت ان التغيير ممكن و مش مستحيل

انا ماشي حاليا في طريق التعافي و باحاول ان خطواتي تكون ثابتة و ما ارجعش لورا تاني
انا واثق في معونة ربنا ليا و انه اكيد هايساعدني في مشوار التعافي